یاغیش

دونَن آخشام بیر اوووچ اولدوزو ایچدیم تَکیمه !

سانجیلانمیش یوخوتَک گؤیلره اوچدوم تَکیمه !

بوشلادیم اؤز باشینا بوردا قارانلیق گئجه نی !

گونشی آیدین اولان ائللره کؤچدوم تَکیمه !

داغلارین رویاسینا قارلی بولودلار دؤشه دیم !

باهارین گوللو دونون ، باخچادا بیچدیم تَکیمه !

اوتوروب یولدا گَله ن گونلریمی گؤزله مه دیم !

چایلارا کؤرپو سالیب  ، دریانی کِئچدیم تَکیمه !

یاغیشین قوشمالارین دفتره یازدیم یِئنه ده !

او گؤزل دویغولاری دونیادا سِئچدیم تَکیمه !

تقی تقی نژاد ((یاغیش))

سی ام آذرماه 1398

بیر نَفَس

ایکی نَفَس

اوچ نَفَس

دؤرد نَفَس

مین لَرجه نَفَس سانادیم

ییغیشیب لار بیربیرینین اوستونه !

قوووشوبلار ایچه ریمده !

اودا دؤنوبلَر !

باغیراجاغام بیر گون اونلاری !

یاندیریب ، کؤله دؤندرسین لَر

بو

 سویوق هاوالاری !

تقی نژاد ((یاغیش))

بیست وششم آذرماه  1398

سانادیم : شمردم          قوووشوبلار : درهم آمیخته اند               باغیراجاغام : فریاد خواهم زد

پاییزین اِئلچی سی ام ، آمما گؤزوم یازدا قالیب !

نئچه ایللردی باهاردان بوشالیب دولمامیشام !

قلبیمه شاختا گلیبدیر ، قوجالیبدیر نَفَسیم !

بیر بئله دردین اَلیندن سارالیب سولمامیشام

اورییم عاشیق اولاندان ، جانیمی یاغلامیشام !

گئجه لَر عشقیمه خاطیر اوجادان آغلامیشام

اؤلدوروب نفسیمی البَت قاپیسین باغلامیشام !

اوتوروب قبرینین اوسته باشیمی یولمامیشام !

دونیانی باشدان آتاندان اوزو تاخمامیشام !

داغلارین اوسته ((یاغیش )) تَک تؤکولوب آخمامیشام !

یاشامین پنجره سیندَن اَریلیب باخمامیشام !

قالمیشام آیری حیاتدا ، آنادان اولمامیشام !

تقی نژاد ((یاغیش))

بیست وپنجم آذرماه 1389

یاشام : زندگی

برای دختر شیرین زبان روستای (( ورنکش)) میانه که در زلزله اخیر جان خودرا ازدست داد وتمام آرزوهای قشنگش را با خود به گور برد ، روحش شاد ویادش گرامی .

ریحانه قیزیم مَن سَنه لای لای چالارام  یات

نیسگیللی بالام یوم گؤزونو  بیرده اویانما

یِئرلرده محبت نَفَسی چوخدان اؤلوبدور

پَروانه کیمی گؤیلره اوچ ، بوردا دایانما

قَلبینده گؤزل آرزولارین یاندی کول اولدو

جَنتده تاپارسان هامیسین ، اونلارا یانما !

عؤمروم نه قَدَر وارسا گؤزوم آغلیاجاقدیر

سَنسیز گوله رَم دونیادا مَن ؟ اَصلَن اینانما

سون گونده کی عالمده قیامت قوپاجاقدیر

تِئز گَل ، یولونو گؤزله ییرَم اویدا یوبانما

آخیردا بِهشتین یِئرینه یات قوجاغیمدا

نیسگیللی بالام یوم گؤزونو بیرده اویانما

تقی نژاد ((یاغیش))

بیست ودوم آبان ماه 1398

سِئوگیمین یاسینی توتدوم بوگئجه !

هَرزادی ، بیر بیر اونوتدوم بو گئجه

عؤمرومون یانماسینا ، بَسدی دِئدیم

یاشلاری  گؤزده قوروتدوم بوگئجه

صاباحین  آغزی ، شیرین قند اولاجاق

آجینی چِینَدیم اوتدوم بو گئجه !

بیلمیرم هاردا بولانمیشدی سؤزوم !

اونو قلبیمده  دوروتدوم بو گئجه !

قوش کیمی  یِئرده داریخمیشدی جانیم

روحومو گؤیده اوچوتدوم بو گئجه

عقلینی دوستا اوتوزموشدو ((یاغیش)) !

عشقینی  بیر هئچه اوتدوم بو گِئجه !

هفدهم مهر 1397

تقی نژاد ((یاغیش))

یاز    دردیمی    ساغالتمادی

یاراما    بیر قیش   باغلایین

گؤیلومه    بولود    دؤشه یین

گؤزومه   یاغیش   باغلا یین

***

تای  توشو  قول  قاناد  چالدی

زیروه لرین   اوستون   آلدی.

چیرپینا      چیرپینا     قالدی

اوره ییمه    قوش    باغلایین

***

بوگونلرده    کئچدی      بلکه

دورنا   اولوب  کوچدو   بلکه

بو    قفس ده    اوچدو   بلکه

ایاغینی     بوش     باغلایین

نادر الهی

آخشاملار،

اؤزونون کؤهنه بئینینده ،

قارانلیقلاری ،

بیر بیرینه  دویون سالیب ،

گئجه نین فرشین توخویور!

گوندوزلر آپاریب ،

 آیدین لیق یئرینه ،

او آداملارا ساتیرکی ،

گؤزلرینی آچاندان ،

گونشین ناغیلین ،

تکجه بایقوشلاردان اِشیدیبلَر.!

پانزدهم فروردین   1397

تقی نژاد ((اغیش))

وقتی خورشیدهم برای تاریکی ها برقصد و پایکوبی کند دیگر از شمعکِ نحیفِ خودباخته   در دل شب چه انتظاری می توان داشت ؟

گونش ده قارانلیق لار اوچون دانس اِئدیب و اوینایان زاما ندا سَن درین گئجه نین قوجاغیندا آزان بیر قیریق شمعیدن نه اومورسان ؟

تقی نژاد ((یاغیش))

چهاردهم مرداد ماه 1398

بوقارانلیق گِئجه نین عؤمرو اوزون اولمیاجاق
گِئنه ده یوردوموزا گون چیخاجاقدیر بیلیرَم

دولاجاق سینه لَره بیر دَفعه ده یاز نَفَسی
سویوغو ، ایستی محبت ییخاجاقدیر بیلیرَم

غَم گِئدیب ، ملتیمین قَلبینه شادلیق گَلَجَک
قوجامان غَملَری بیر بیر سیخاجاقدیر بیلیرَم

مهربان اِئللَریمینده گوله جَک دیر دوداغی
اویازیق دوشمَنیمیز آغلیاجاقدیر بیلیرَم

اوتوموز قیزدیراجاقدیر سویویان کورسوموزو
آلووواؤزگه لَری یاندیراجاقدیر بیلیرَم

نه قَدَر بیزده نَفَس وار وَطَنیم اؤلمویه جَک
تانیرمیز اؤلکه میزی ساخلیاجاقدیر بیلیرَم

هِئچ کَسین دَردین الیندَن اورَیی سولمیاجاق
ساغالیبدیر یارامیز ، توخدوراجاقدیر بیلیرَم

باهارین وَقتی بولودلار گَله جَک نِیسانینان
((یاغیشین )) قَلبی دولوبدور ، یاغاجاقدیر بیلیرَم

تقی نژاد ((یاغیش))

پنجم فروردین ماه 1399

اِحساسِ قَلَم بَس که دِگرگون شده امشب
اَزدَستِ سخن قافیه مجنون شده امشب !

با دیدنِ اَنبوهِ پَریشانی شاعر
قلبِ غَزَلِ خسته پُراز خون شده امشب !

تَصویرِ خجالت زده یِ دفترِ شعرم
دَر آئینه یِ رویِ تو گُلگون شده امشب !

افسرده شده قصه یِ تکراریِ دیدار !
اَفسانه یِ خوبان همه اَفسون شده امشب !

هَر بیت که از شوقِ وِصالِ تو نوشتم
با نغمه یِ هجرانِ تو مَحزون شده امشب !

اندیشه یِ تنهایی این خانه یِ تاریک
در حسرتِ یک پنجره داغون شده امشب !

چون عاشقِ دیوانه از این خواب پَریده
آن دیده یِ باران زده مَظنون شده امشب !

تقی نژاد ((یاغیش))

هشتم فروردین ماه 1399

تقدیم به همه پرستاران و پزشکانی که در این روزهای سخت با همه مشکلات وکمبودهایی که دارند عاشقانه ایستاده اند وتاپای جان با کرونا می جنگند تا از سلامتی ملت عزیزمان دفاع کنند :                                                                                                                                               بیرمَلَک دیر گیرینیب آغ لباسا
مهربان قَلبینه ایمان یاراشیر
وارلیغی گوللو باهاردان یارانیب
جان وِئرَن گؤزلَرینه جان یاراشیر

هَرزامان خَسته لَرین یولداشیدیر
قارداشی اولمیانین قارداشیدیر
طاقتی چوخدو ، دؤزوملَر داشیدیر
اؤزینه سِئومَلی انسان یاراشیر

اؤلسه ده یولدا دایانماز بو آدام
چاغیران اولسا یوبانماز بو آدام
شَرَفین دونیادا دانماز بو آدام
آدینا یاخچی بیر عنوان یاراشیر

قارا گونلَرده اوزو آغدی اونون
دایانیبدیر اورَیی داغدی اونون
هَرنَفَسدَن نَفَسی ساغدی اونون
او یاشیل اَللَره دَرمان یاراشیر

جَنگ اولوب ، ملته سَربازدی بوگون
جبهه ده اسلَحه سی آزدی بوگون
باهارین وَقتی سولان یازدی بوگون
قیرمیزی لاله سینه قان یاراشیر

کرونا ایندی گَلیب دیر بَدَنه
او چَتین یِئرده پَرَستاردی سَنه
چیرپینیر قَلبی ((یاغیش)) تَک وَطَنه
قوجامان یوردونا قوربان یاراشیر

تقی نژاد ((یاغیش))

بیست و پنجم اسفندماه 1398

بیر گولدو آنام ، گوللَر ایچینده آدی سولماز
عالَمده دولانسان ، اونا تای مهربان اولماز

عِشقین سَسی لای لایدی مقدس دوداغیندا
اولدوز کیمی پارلاقدی محبت چیراغیندا

تانریم اونو قرآندا کی سؤزدَن یارادیب دیر
آیدیندی گؤزَل سِئوگی نی گؤزدَن یارادیب دیر

سونسوز حیاتین قَلبی یاشار هَر نَفَسینده
عِشقین سایی سی حددَن آشار هَر نَفَسینده

عؤمرونده آچان گوللره بوقاندی بو انسان
اؤز اولادینین دَردینه قورباندی بو انسان

چوخداندی گِئدیب دیر (( یاغیشین )) بَختی یاتیب دیر
ایللَردی قوجالمیش حیاتین گؤزدَن آتیب دیر

گؤیلَرده مَلَک لَر آدینی باشدا یازیب لار
قَبرینده اورَه سؤزلَریمی داشدا یازیب لار

((سنسیز یاتارام هَر گِئجه غَملَر قوجاغیندا
سینه مده جوشار خاطیرین عِشقین چاناغیندا))

تقی نژاد ((یاغیش))

بیست وششم بهمن ماه 1398

بیرغَملی حکایت یازیلیبدیر کتابیمدا
آیلاردی مَنیم طاقَتیمی اَلدَن آلیب دیر

نیسگیللی ناغیلدیر ، یارانیب قانلی ساواشدا
البته بو چیرکین یازی تاریخده قالیب دیر

اَفغانلی قیزین یاندیریجی ناله لَریندَن
دؤهتور دانیشیب ، شاعیر اونو نظمه سالیب دیر:

بیر گون اوتوموشدوم تَکیمه صَندَلین اوسته
گؤردوم خیابانلاردا صَدا چوخ اوجالیب دیر

بیلدیم اوزامان شَهره آغیر بومبا دوشوبدور
بیر خیردا قیزین اینجه قولو ، پارچالانیب دیر

چاتدیم دادینا های هایینان سون نَفَسینده
باخدیم اوشاغین رنگی خَزان تَک سارالیب دیر

قیز بیلدی گَرَکدیر قولو قوپسون بَدَنیندَن
آیدیندی ، اؤلوم گول باشینا کؤلگه سالیب دیر

گؤز آچدی منه ، باخدی دِئدی : سَنده گؤرورسَن
عالمده جاوانلیق چاغی عؤمروم قوجالیب دیر

کَس ساغ قولومو ، کؤینَگیمی کَسمه سَن آلله
یوخدور لباسیم ، پالتاریمیز تَک بو قالیب دیر !

تقی نژاد ((یاغیش))

نهم بهمن ماه 1398

یاندیریجی : سوزان             اینجه : نازک