بوقارانلیق گِئجه نین عؤمرو اوزون اولمیاجاق
گِئنه ده یوردوموزا گون چیخاجاقدیر بیلیرَم
دولاجاق سینه لَره بیر دَفعه ده یاز نَفَسی
سویوغو ، ایستی محبت ییخاجاقدیر بیلیرَم
غَم گِئدیب ، ملتیمین قَلبینه شادلیق گَلَجَک
قوجامان غَملَری بیر بیر سیخاجاقدیر بیلیرَم
مهربان اِئللَریمینده گوله جَک دیر دوداغی
اویازیق دوشمَنیمیز آغلیاجاقدیر بیلیرَم
اوتوموز قیزدیراجاقدیر سویویان کورسوموزو
آلووواؤزگه لَری یاندیراجاقدیر بیلیرَم
نه قَدَر بیزده نَفَس وار وَطَنیم اؤلمویه جَک
تانیرمیز اؤلکه میزی ساخلیاجاقدیر بیلیرَم
هِئچ کَسین دَردین الیندَن اورَیی سولمیاجاق
ساغالیبدیر یارامیز ، توخدوراجاقدیر بیلیرَم
باهارین وَقتی بولودلار گَله جَک نِیسانینان
((یاغیشین )) قَلبی دولوبدور ، یاغاجاقدیر بیلیرَم
تقی نژاد ((یاغیش))
پنجم فروردین ماه 1399
عؤمرو اوزون ,بوقارانلیق گِئجه منبع
درباره این سایت